Tag Archives: ymgysylltiad

Rhwydweithio ym Myd Natur

Yma yn Cyfranogaeth Cymru, rydym wrth ein bodd yn treulio amser yn yr awyr agored ac ers tro bellach rydym wedi bod yn trafod y syniad o gynnal rhwydwaith ym myd natur.

Felly, yn fuan ar ôl penwythnos Gŵyl Banc Calan Mai, cynhaliwyd rhwydwaith ymarferwyr yn yr awyr agored am y tro cyntaf erioed gyda chymorth Tom Moses o Barc Cenedlaethol Arfordir Penfro. Dyma grynodeb o’r hyn a ddigwyddodd:

Yn gyntaf, roedd y tywydd yn fendigedig!

20160504_102746.jpg

Dim argoel o gwbl am law

IMG_20160504_205021

Roedd Tom wedi cynnau’r tân yn gynt y bore hwnnw, felly roedd paned boeth o de a choffi ar gael wrth i ni gyrraedd.

20160504_103712

Dangosodd Jill Simpson, o Barc Cenedlaethol Arfordir Penfro, y dodrefnyn godidog hwn i ni (mae’n gymaint mwy na mainc yn unig). Fe’i dyluniwyd a’i greu gan bobl ifanc leol ar gyfer y coetir hwn.

20160504_112318

20160504_112404

Aeth Matt, un o wirfoddolwyr Arfordir Penfro, â ni am dro ar hyd llwybr cerdded gan ddysgu darllen map a sgiliau cyfeiriannu sylfaenol.

20160504_120738

Ar hyd y ffordd, fe ddaethom ar draws wartheg ifanc chwilfrydig a oedd yn awyddus iawn i ddweud shwmae

20160504_121708

Mae modd gwneud te o blanhigion, gwreiddiau a ffyngau amrywiol o’r goedwig (ond peidiwch byth â bwyta unrhyw beth gwyllt rydych wedi’i hel onid ydych yn hollol siwr ei fod yn ddiogel!)

20160504_123628

Tamaid i aros pryd: bara cynnes yn syth o’r ffwrn agored gyda garlleg gwyllt a oedd newydd ei hel.

20160504_124110

Defnyddiwyd dull pleidleisio cyfranogol – ‘pleidlais gerrig’ – i benderfynu pa de oedd fwyaf blasus (dant y llew oedd ‘at ddant’ y mwyafrif).

20160504_124033

Ond roedd mwy i’w wneud na dim ond yfed te, sgwrsio â gwartheg a mynd am dro, thema’r cyfarfod rhwydweithio oedd newid ymddygiad. Gofynnodd Cyfranogaeth Cymru y cwestiwn i fudiadau sy’n gweithredu’r Egwyddorion Cenedlaethol ar gyfer Ymgysylltu â’r Cyhoedd yng Nghymru: pa fath o newid ymddygiad sy’n gorfod digwydd o fewn mudiad? Atebion ar y bwrdd gwyn magnetig…

20160504_132843

Yn ddiweddar, fe wnaethom gyhoeddi rhestr gyfeirio wrth weithredu’r Egwyddorion Cenedlaethol ac arni gwestiynau ar gyfer pob egwyddor. A yw’ch mudiad chi wedi gorfod newid ei ymddygiad wrth ymgysylltu? A ydych chi wedi gorfod ceisio dylanwadu ar ymddygiad eraill er mwyn gwneud gwelliannau? Ymunwch yn y sgwrs drwy adael sylw isod.

Yn olaf… gadael (bron) dim ôl

Mae’r clai hwn, sy’n hydawdd mewn dŵr ac yn sychu ag aer, yn ffordd wych i bobl ‘adael eu marc’ ym myd natur heb niweidio’r amgylchedd o gwbl. Aethom â’n sbwriel i gyd i ffwrdd gyda ni.

20160504_134159

20160504_133852

Diolch o galon i Tom, Jill a Matt o Awdurdod Parc Cenedlaethol Arfordir Penfro am eu cymorth i sicrhau llwyddiant y diwrnod.

Os ydych chi’n ystyried cynnal digwyddiad neu gyfarfod cymunedol yn yr awyr agored, cofiwch roi gwybod i ni fel y gallwn eich helpu i’w hyrwyddo.

Cofiwch gadw llygad ar ein gwefan am fanylion digwyddiadau rhwydweithio i ddod.

Cynhelir ein ‘digwyddiad Rhwydweithio Cymru Gyfan’ o’r enw ‘Ymgysylltu â chymunedau amrywiol’ yn Llandrindod ar 14eg Gorffennaf; mynediad am ddim!

Sarah

Pam mae cyfranogiad yn wych

Dyma fy narn olaf o waith i ar gyfer Cyfranogaeth Cymru, ac rydw i eisiau dweud diolch yn fawr i bawb rydw i wedi gweithio gyda dros y tair blynedd diwethaf. Mae fy nghydweithwyr yn Gyfranogaeth Cymru yn unigolion sy’n hynod o ymroddedig. Maen nhw wedi fy ysbrydoli fi gan fod nhw’n gweithio mor galed fel rhan o dîm bychan sy’n gweithio ar sail genedlaethol.

P1000191

Mae’r prosiect wedi’i leoli yng Nghyngor Gweithredu Gwirfoddol Cymru, ac rydw i wedi gweithio yma hyd yn oed yn hirach (wyth mlynedd i’r mis). Wnes i erioed meddwl y byddwn i’n hyfforddi a hwyluso pan ddechreuais weithio yma fel Cynorthwyydd Gweinyddol ar y Ddesg Gymorth.

Rydw i wedi cyfarfod â staff gwych mewn sawl gwasanaeth cyhoeddus, sy’n benderfynol o agor y strwythurau gwneud penderfyniadau yn eu mudiadau. Rydw i wedi cwrdd â chymaint o bobl o feysydd amrywiol sy’n frwdfrydig ynghylch sicrhau bod gwasanaethau cyhoeddus yn dryloyw ac yn atebol.

Ar ochr arall y geiniog, rydw i wedi mwynhau’r gwaith ymarferol rydym wedi gwneud gyda dinasyddion ledled Cymru. Rydw i wedi cwrdd â chymaint o bobl ymroddedig sydd wedi bod yn fwy na pharod i roi o’u hamser i geisio sicrhau bod gwasanaethau cyhoeddus, a chymdeithas yn gyffredinol, yn well. Dyma’r rheswm mai’r darn mwyaf cofiadwy o waith rydw i mi yw ein gwaith ar Banel Dinasyddion ar gyfer Gwasanaethau Cymdeithasol yng Nghymru.

Mae Involve wedi ysgrifennu pamffled mawr ar gyfranogiad a elwir From Fairytale to Reality. Mae’r pamffled yn chwalu’r mythau ynghylch pam nad yw cyfranogiad yn ymarferol, gan gynnwys y canlynol:

  • Mae ymgysylltu yn rhy ddrud
  • Nid yw dinasyddion yn gallu rhoi’i farn yn effeithiol
  • Mae ymgysylltu dim ond yn gweithio ar gyfer materion hawdd
  • Dylem osgoi rhoi ormod o bŵer i ddinasyddion ar bob cyfrif
  • Nid yw dinasyddion yn awyddus i gymryd rhan, dim ond gwasanaethau da maen nhw eisiau

Pan wnes i wylio aelodau’r panel yn rhoi tystiolaeth i’r Cynulliad Cenedlaethol ar gyfer y pwyllgor Iechyd a Gofal Cymdeithasol Cymru ar 16 Mai, fe wnaeth yr aelodau’r panel chwalu pob un o’r mythau – maent yn siarad am daliadau uniongyrchol (a allai wneud gwasanaethau yn rhatach gan eu bod yn teilwra i anghenion pobl), mae ganddynt ymwybyddiaeth o faterion y gwasanaeth maent yn eu defnyddio, maent yn dyrannu bil cymhleth a thrwm iawn, maent yn darparu ymatebion ystyriol ac yn fanwl ac maent yn awyddus iawn i’w lleisiau gael eu clywed.

Hyd yn oed os byddech yn rhoi rhestr o’r pwyntiau mae’r panel yn dweud wrthyf, ni fyddai’r profiad uniongyrchol gen i i wir drafod y pwyntiau a’r diffygion, gan eu bod nhw’n dod ar draws rhain o ddydd i ddydd. Gallaf ddweud yn bendant na fyddwn i’n gallu siarad am y pwyntiau yma mewn ffordd angerddol fel y maent yn ei wneud.

Pan wnes i wylio’r panel yn rhoi tystiolaeth, fe wnaeth e daro fi mai dim ond trwy ofyn i bobl beth yw eu hanghenion nhw gall gwasanaethau cyhoeddus wir diwallu anghenion pobl a gweddnewid gwasanaethau cyhoeddus.

– Dyfrig

Drilio i lawr

Rydw i wedi bod yn gweithio i Gyfranogaeth Cymru am dair blynedd, ond mis nesaf byddai’n dechrau swydd newydd fel Swyddog Cyfnewid Gwybodaeth gyda’r Gyfnewidfa Arfer Dda yn Swyddfa Archwilio Cymru, felly byddai rhai’n dweud fy mod i wedi gadael e braidd yn hir i wneud hyfforddiant achrededig Cyfranogaeth Cymru ar ymgysylltu â’r cyhoedd! Er fy mod i’n teimlo’n hyderus yn gweithio ym maes cyfranogiad, fe wnes i dal dysgu llawer o awgrymiadau defnyddiol iawn ar sut gallai sicrhau fy mod i’n hymgysylltu’n fwy effeithiol yn y dyfodol.

Adran ‘drilio i lawr’ y cwrs oedd y rhan wnaeth agor fy llygaid i’r fwyaf, sy’n eithaf brawychus, gan ei fod e’n hanfodol i ymgysylltu’n effeithiol â’r cyhoedd. Mae’r dull yn caniatáu i ymarferwyr i sicrhau eu bod nhw’n tynnu’r casgliadau cywir o’r gwaith maen nhw’n gwneud.

Funnel - CYM

Amlinellodd y cwrs tri cham i drilio i lawr:

  1. Casglu amrywiaeth eang o wybodaeth: Rhaid ein bod ni’n agored i ystod eang o safbwyntiau – mae angen i ni ddechrau o dudalen wag o bapur.
  2. Holwch a gwirio: Ffocysu ar yr ymatebion a’r casgliadau ni’n tynnu ohonynt er mwyn eu gwirio nhw a sicrhau ein bod ni’n deall y pwyntiau sy’n cael eu gwneud.
  3. Blaenoriaethu, neu ddod i gasgliad: Mae gennym gasgliad gwybodus o ymatebion.

Mae hyn yn cyd-fynd â’r disgrifiad o’r twndis a roddwyd inni – ein bod ni’n agored ar y dechrau, ac yna trwy fireinio’r wybodaeth rydym gyda gwybodaeth benodol ar ddiwedd y broses.

Mae hyn i gyd yn swnio’n amlwg, ond ar ôl dau ddiwrnod cyntaf y cwrs rwy’n teimlo’n llawer mwy parod i wneud hyn, yn enwedig achos defnyddiom dechnegau cyfranogol yn ystod y cwrs i alluogi ni roi hyn ar waith. Mae dull fel ‘Snot Man’ (fy ffefryn personol a gafodd ei ddyfeisio gan Vicky Butler, lle y byddwn yn gofyn beth sy’n ‘snot fair’, gydag ymatebion ar nodiadau post-it lliw snot – neis!) yn gallu cael eu defnyddio i gael adborth, a gellir defnyddio dulliau graddio neu gontinwwm gwerthoedd (lle mae pobl yn trefnu eu hunain mewn llinell, gyda’r ddau ben yn cynrychioli’r ddau begwn barn) i flaenoriaethu ymatebion.

Snot Man

Fe wnaeth fy nghydweithiwr Sarah Ball mynychu’r cwrs hefyd, ac mae hi’n mynd i flogio’r wythnos nesaf am beth ddysgodd hi o’r cwrs. Rwy’n edrych ymlaen at glywed beth wnaeth hi ddysgu o’r cwrs!

– Dyfrig

E-gyfranogaeth ac adrodd storiau

Mae cyfranogaeth yn gysyniad mor fawr, mae fe bron yn frawychus! Mae’n cynnwys dulliau traddodiadol i gynnwys pobl a chymunedau yn bersonol, a dulliau ar-lein i ymgysylltu ag unigolion a chymunedau megis cyfryngau cymdeithasol.

Rwy’n ddigon ffodus i weithio mewn rôl lle dwi ‘di cael llawer o ryddid i ddefnyddio cyfryngau cymdeithasol. Rwy’n gwybod fy mod i’n lwcus oherwydd dywedodd 53% o’r rhai a ymatebodd i’r Arolwg Cymru gyfan ar ddefnydd y rhyngrwyd a chyfryngau cymdeithasol gan wasanaethau cyhoeddus bod polisïau technoleg gwybodaeth gyfyngol yn dal i fod yn rhwystr lle maen nhw’n gweithio (bydd yr adroddiad llawn ar gael yn fuan!).

Rydw i wedi bod yn lwcus i fynd i sawl cwrs a digwyddiad ar y pwnc yma ac rydw i wedi cwrdd â llawer o bobl sydd wedi dysgu siwd gymaint i mi am gyfryngau cymdeithasol, gan gynnwys Louise Brown, a oedd yn rhedeg cwrs gwych ar gyfer Lleisiau dros Newid Cymru ar ymgyrchu ar-lein (ac sydd gyda blog gwych hefyd), ac Esther Barrett a Paul Richardson o RSC Cymru, a wnaeth rhedeg digwyddiad ar gyfer staff WCVA ar ddefnyddio cyfryngau cymdeithasol.

Roedd y ddau gwrs yn ymarferol iawn a rhoddodd syniadau i mi am ddefnyddio offer rhad ac am ddim i ymgysylltu â phobl. Dysgodd Esther i mi sut i ddefnyddio Audacity, ac rydw i wedi blogio am ddefnyddio hwn i werthuso ein prosiect yn y gorffennol.

Y tro nesaf wnes i redeg i mewn i Esther oedd yn nigwyddiad Adrodd Straeon Digidol DS6 yn Aberystwyth, lle roeddwn i wedi fy lleoli ar y pryd. Fe wnaeth Esther ddechrau trafodaeth ddifyr am ddefnyddio dulliau anhraddodiadol fel Facebook i ddweud storïau anhraddodiadol. Gallwch weld a chlywed Esther yn siarad mwy am hyn yn y fideo uchod. Fe wnaeth ei ymateb wir wneud i mi feddwl am sut ni’n cael storïau pobl i ddylanwadu ar wasanaethau cyhoeddus, yn enwedig wrth i fwy a mwy o wasanaethau  defnyddio cyfryngau cymdeithasol i ymgysylltu. Yn dilyn hyn wnaeth Esther gynnal cynhadledd ar-lein ar Elluminate am y profiad. Gallwch wylio’r sesiwn yma. Mae’n ymdrin â sut mae pobl yn defnyddio technoleg i adrodd straeon mewn ffyrdd creadigol, o’r nofel Twitter a ysgrifennwyd yn Tweets at y defnyddiwr Facebook a ddogfennodd genedigaeth ei phlentyn. Mae’n anhygoel pa mor bwerus yw’r naratifau yma.

Bydd Esther a Paul o RSC Cymru yn fy helpu i i redeg y cwrs Cyflwyniad i e-gyfranogaeth, sy’n rhan o’n rhaglen hyfforddiant cyfredol. Fe fydd e’n teimlo’n ychydig yn od i arwain y dydd pan rydw i wedi dysgu cymaint oddi wrth Esther a Paul, ond os ydych chi’n dod rwy’n gobeithio eich bod chi’n ffeindio’r cwrs mor ddefnyddiol ag fe wnes i ffeindio hyfforddiant RSC Cymru!

– Dyfrig

Defnyddio cyfryngau cymdeithasol i ymgynghori o fewn y sector cyhoeddus

Er fy mod i’n siaradwr Cymraeg rhugl, mae fy hyder wrth ei ddefnyddio yn y gwaith yn amrywio ac yn dibynnu ar y sefyllfa. Rydw i wedi bod yn ymateb i ymgynghoriadau ar ran Cyfranogaeth Cymru am tua dwy flynedd, ond dim ond yn y mis diwethaf ymatebais yn y Gymraeg am y tro cyntaf. Rwy’n siarad Cymraeg bob dydd, ond dydw i ddim yn dod ar draws yr iaith sy’n cael ei ddefnyddio mewn ymgynghoriadau o ddydd i ddydd.

Pan gefais wahoddiad i wneud cyflwyniad yn symposiwm Tu Hwnt i’r Bwlch Comms Cymru ar yr iaith Gymraeg a chyfryngau cymdeithasol, roeddwn i’n awyddus ar unwaith – rydw i wedi mwynhau defnyddio cyfryngau cymdeithasol fel rhan o fy rôl i. Maen nhw wedi helpu torri lawr ffiniau confensiynol gwasanaeth gwybodaeth, gan mai dim ond darlledu gwybodaeth wnaeth mudiadau yn y dyddiau a fu. Mae cyfryngau cymdeithasol wedi fy ngalluogi i rannu syniadau, dysgu oddi wrth eraill a rhwydweithio gyda mudiadau ledled y byd.

Fel siaradwr Cymraeg, rydw i’n awyddus i gael y cyfle i fyw fy mywyd trwy gyfrwng y Gymraeg ble bynnag mae’n bosib. Er mwyn galluogi hyn i ddigwydd, mae rhaid fy mod i’n cael y cyfle i ymgysylltu yn iaith fy newis i. Rwy’n ffodus fy mod i’n byw yng Nghaerdydd, ble mae gan Gyngor Caerdydd cyfrif Twitter Cymreig ardderchog, sy’n fy ngalluogi i wneud hynny.

Yn anffodus, dyw pawb yng Nghymru ddim yn cael yr un cyfle. O’r 257 o bobl a gwblhaodd Arolwg Cymru gyfan ar ddefnydd y rhyngrwyd a chyfryngau cymdeithasol gan wasanaethau cyhoeddus, dim ond traean (33%) o’r ymatebwyr dywedodd bod ganddynt ffrydiau cyfryngau cymdeithasol Cymraeg neu ddwyieithog, tra bod 28% yn ansicr a doedd dim gan 39%.

Yn ddiddorol, roedd teimladau cymysg yn yr arolwg ac yn y digwyddiad am gael un ffrwd ddwyieithog neu ffrydiau ar wahân ar gyfer y Gymraeg a Saesneg. Roedd rhai’n teimlo bod un ffrwd yn normaleiddio’r defnydd o Gymraeg, tra bod eraill yn teimlo roedden nhw’n hoffi cael yr opsiwn o ddilyn ffrwd o’u dewis fel bod nhw’n gallu ymgysylltu yn yr iaith roedden nhw’n dewis.

Mae canlyniadau’r arolwg wedi dangos bod pobl yn meddwl mai un o’r rhwystrau mwyaf cyffredin yw does dim digon o staff sy’n siarad Cymraeg gan fudiadau er mwyn cynnal gwasanaeth effeithiol. Roedd pobl yn meddwl bod ymateb cyflym yn hollbwysig wrth ddefnyddio cyfryngau cymdeithasol.

Roedd ymatebwyr hefyd yn teimlo bod e’n anodd cael pobl i ymgysylltu yn y Gymraeg, ac roedd e’n anodd gwneud achos busnes ar gyfer buddsoddiad ychwanegol pan mae defnydd yn isel. Fodd bynnag, dywedodd rhai ymatebwyr eu bod nhw’n teimlo bod llai o siaradwyr Cymraeg yn ymgysylltu trwy gyfryngau cymdeithasol achos doedd cynnwys Cymreig ddim wedi ei ysgrifennu mewn ffordd byddan nhw’n siarad, a bod negeseuon yng nghyfieithiad uniongyrchol o neges Saesneg fel arfer.

Ar hyn o bryd rwy’n ail-ysgrifennu fy argymhellion ar gyfer yr adroddiad yn dilyn penderfyniad y Gweinidog ar Safonau Iaith Gymraeg, ond mae fy argymhellion drafft yn cynnwys bod y defnydd o gyfryngau cymdeithasol trwy’r Gymraeg yn cael ei brif ffrydio i mewn i waith cyfathrebu mudiadau, yn hytrach na bod yn ychwanegiad. Hefyd rydym yn argymell bod gwaith ymgysylltu yn bodloni egwyddor 5 o’r Egwyddorion Cenedlaethol ar gyfer Ymgysylltu â’r Cyhoedd yng Nghymru, sef ‘Ni fydd unrhyw jargon yn rhan o’r wybodaeth a ddarperir a bydd yn briodol ac yn hawdd i’w deall’. Mae’r nodiadau cyfarwyddyd yn dweud dylai ‘sicrhau bod y wybodaeth ar gael yn y Gymraeg ac yn Saesneg, yn ogystal â mewn ieithoedd ethnig lleiafrifol eraill’. Mae’n hanfodol ein bod ni’n ymgysylltu mewn ffyrdd mae pobl eisiau ymgysylltu trwyddo, a hefyd ein bod ni’n ymgysylltu ar delerau bobl gan ddefnyddio iaith glir gall pawb deall. Mae cyfryngau cymdeithasol yn ffordd ddelfrydol i wneud hyn, gan fod ei natur anffurfiol yn golygu y gallwn ddefnyddio iaith glir i gyfathrebu’n well â phobl, beth bynnag yw eu dewis iaith.

– Dyfrig

Sut mae plant a phobl ifanc yn bwydo i mewn i Banel Dinasyddion ar gyfer Gwasanaethau Cymdeithasol yng Nghymru

Mae’r ail rownd o gyfarfodydd y Panel Dinasyddion ar gyfer Gwasanaethau Cymdeithasol yng Nghymru bellach wedi cymryd lle. Mae yna banelau oedolion yn y Gogledd, y De Ddwyrain a De Orllewin Cymru, ac rydym hefyd yn gweithio gyda phlant a phobl ifanc ar draws Cymru sy’n cael eu heffeithio gan sut mae gwasanaethau cymdeithasol yn cael eu darparu.

Mae barn plant a phobl ifanc yn cael eu bwydo i mewn gan Beckii Parnham, gofalwr ifanc o Dorfaen, a oedd wedi gwneud cais i fod yn aelod o’r panel yn wreiddiol. Rydym mor lwcus bod Beckii yn gweithio gyda ni – mae Beckii yn gofalu am ei mam, ei brawd a’i chwaer, mae hi’n gynrychiolydd ar gyfer y Ddraig Ffynci, mae hi’n helpu i redeg grŵp gofalwyr ifanc, mae hi wedi gwneud profiad gwaith gyda’r tîm Gwasanaethau Cymdeithasol yn ei ardal ac mae hi bellach yn gweithio gyda ni i fwydo barn plant a phobl ifanc i mewn i’r Fforwm Partneriaeth Gwasanaethau Cymdeithasol. Rwy’n teimlo ychydig yn ddiog pan rwy’n clywed am bopeth mae hi’n wneud!

Gofynnais i Beckii pam roedd hi eisiau i fod ar y panel, a dywedodd hi ei bod hi “eisiau bod ar y panel oherwydd y profiadau rydw i wedi cael a’r profiadau rydw i eisiau rhannu. Mae gen i brofiad o weithio ochr yn ochr â Gwasanaethau Cymdeithasol ac mae gen i brofiad o dderbyn y gwasanaethau “. Gallwch glywed Beckii siarad mwy am hyn a’r gwaith a wnaethom gyda Fforwm Ieuenctid Torfaen yn y AudioBoo isod, lle cyfarfuom â rhai o’r bobl ifanc yn y fideo uchod (sy’n cynnwys Beckii, sef yr un ar y chwith yn y llun ar ddechrau’r fideo).

Hyd yma rydym wedi ymweld â Chyngor Gofal Pobl Ifanc Wrecsam, Gofal Croesffyrdd Abertawe Castell Nedd-Port Talbot a Gofal Croesffyrdd Cwm Taf, Whizz Kidz ym Mangor, Lleisiau o Ofal Cymru, Eat Carrots, Be Safe From Elephants (sy’n enw bendigedig!), ac fe fyddn yn ymweld a rhagor yn y misoedd sydd i ddod. Byddwn yn ymweld â grwpiau ledled Cymru o’r nodweddion gwarchodedig yn y Ddeddf Cydraddoldeb er mwyn sicrhau ein bod ni’n clywed gan amrywiaeth eang o bobl ifanc.

Mae rhai adnoddau gwych ar weithio gyda phlant a phobl ifanc i gael. Mae ganddo ni rai cyhoeddiadau defnyddiol sydd ar waelod y dudalen hon ar ein gwefan. Gallwch glywed am y gwaith diweddaraf sy’n cael ei wneud gyda phobl ifanc yng Nghymru drwy ymuno â Rhwydwaith Gweithwyr Cyfranogiad Cymru, ac mae Uned Cyfranogiad Achub y Plant Cymru wedi cynhyrchu sawl canllaw Blast Off! gwych, a gallwch hefyd dod o hyd i lawer o hyfforddiant, gwefannau ac adnoddau ar http://www.participationhub.org.uk.

– Dyfrig

Rhannu gwybodaeth ac adborth – ein Rhwydweithiau Cyfranogaeth Chwefror / Mawrth

Sesiynau ymarferol yw ein Rhwydweithiau Cyfranogaeth sy’n cael eu cynnal i helpu mudiadau gwasanaethau cyhoeddus i edrych ar faterion; defnyddio dulliau gwahanol i ymgysylltu; i rannu arfer da; ac i rwydweithio. Maen nhw’n cael eu cynnal yng Ngogledd, De Ddwyrain a De Orllewin Cymru.

Mae’r Rhwydweithiau yn cymryd lle pedwar gwaith y flwyddyn, ac fe wnaeth y rhain edrych ar rannu gwybodaeth ac adborth. Mae’r themâu yma yn cael eu hamlygu yn aml gan eu bod nhw’n ganolog i lwyddiant neu fethiant ymgynghori ac ymgysylltu, felly fe benderfynon ni i neilltuo’r rownd yma o rwydweithiau i archwilio’r materion yma.

Rydym bob amser yn dechrau’r rhwydweithiau gyda rhew-torwyr a.k.a. y Marmite o gyfranogi – chi naill ai wrth eu bodd gyda nhw neu’n casáu nhw! Rhaid i mi ddweud fy mod i wedi ffeindio eu bod nhw’n helpu pobl i ddod i ‘nabod ei gilydd ar ddechrau’r digwyddiad. Mae hyn yn hanfodol, yn enwedig ar ddechrau digwyddiadau fel rhain sy’n ffocysu ar rwydweithio!

Yn yr achos hwn, gofynnwyd i gyfranogwyr gyflwyno’r person oedd yn eistedd nesaf iddyn nhw drwy ddarganfod eu henwau, teitlau swyddi, mudiad a’r rheswm daethon nhw i’r rhwydwaith. Fe wnaeth hyn cymryd y pwysau i ffwrdd o unigolion a allai wedi bod yn anghyfforddus yn cyflwyno eu hunain, ac mae’n ddefnyddiol i’r rhai sy’n casáu rhew-torwyr fel arfer! Fel y trafodwyd ddoe yn y rhwydwaith De Ddwyrain, y peth pwysig yw teilwra’r ymarfer at eich cynulleidfa fel y gallwch sicrhau eu bod nhw’n dod i adnabod ei gilydd, ond hefyd eu bod nhw’n teimlo’n gyfforddus yn y sesiwn.

Fe wnaeth yr ymarfer cyntaf edrych ar rannu gwybodaeth rhwng mudiadau. Fe wnaeth y tri rhwydwaith ffeindio llawer o rwystrau a llawer o brosesau a allai helpu rhannu gwybodaeth i ffynnu.

IMG00413-20130306-1304

Cyn y sesiwn fe wnes i dynnu llun balŵn awyr poeth. Yn y sesiwn gofynnais i gyfranogwyr roi post-its ar bwyntiau penodol o’r llun er mwyn tynnu sylw at:

  • Beth sy’n dal hyn yn ôl?
  •  Pwy sydd angen cymryd rhan?
  •  Beth sydd angen i fod ar waith er mwyn i rannu gwybodaeth dechrau hedfan?
  • Beth allai chwythu’r balŵn oddi ar ei lwybr?
  • Beth fydd yn gwneud iddo wir hedfan?

Roedd e’n ymddangos bod yr ymarfer wedi cael pobl i feddwl am y pwnc, ac wrth i ni drafod y dull fe wnaeth cyfranogwyr cyfrannu pwyntiau diddorol iawn ynghylch sut y byddai nhw’n addasu’r dechneg. Awgrymodd David Lloyd o TPAS Cymru i ddefnyddio post-its lliw gwahanol ar gyfer grwpiau gwahanol fel eich bod chi’n gallu gweld pwy ddywedodd beth, a hefyd y gallech gasglu’r post-its mewn amlenni sydd wedi’u labelu’n glir er mwyn sicrhau nad ydych yn colli unrhyw adborth gwerthfawr. Rhannodd Steph Landeryou o Lywodraeth Cymru manylion o brotocol WASPI yn y Rhwydwaith De-ddwyrain, a gallwch ddod o hyd i wybodaeth bellach yma. Rwy’n credu ei fod yn deg i ddweud fy mod i’n dysgu’r un faint ag y mae mynychwyr yn wneud. Gallwch darllen y nodiadau o’r sesiwn yma.

Ar gyfer yr ail ymarfer gofynnais beth fyddai’r broses adborth gwaethaf yn y byd yn edrych fel. Yna gofynnais i gyfranogwyr i feddwl am ba gamau y gallan nhw gymryd i stopio hyn rhag digwydd.

IMG00417-20130306-1602

Roedd e’n ymddangos bod pawb wedi eu hysbrydoli trwy edrych ar yr ochr negyddol yn gyntaf, achos yn anffodus rydyn ni gyd wedi cael profiad o adborth aneffeithiol! Ond yn ddiddorol fe wnaeth hyn hefyd helpu ni i ganolbwyntio ar beth allwn roi ar waith i stopio hyn rhag digwydd. Yn Rhwydwaith De Orllewin Cymru fe godwyd y pwynt bod rhaid i chi fod yn ofalus cyn defnyddio’r dechneg yma, oherwydd gallai’r ffaith eich bod chi’n ffocysu ar elfennau negyddol gwaethygu rhai materion. Ond hefyd i’r gwrthwyneb fe awgrymwyd gall y dechneg helpu rhai grwpiau i ddod dros rhai materion ac i gynllunio ffordd adeiladol ymlaen.

Yna rhedom sesiwn ‘o gwmpas y grŵp’, sy’n galluogi pobl i rannu manylion am ba weithgareddau cyfranogol maen nhw’n gwneud ar hyn o bryd, unrhyw arferion da y maent wedi dod ar draws, a hefyd unrhyw broblemau maen nhw’n cael. Mae fe bob amser yn wych i glywed am y gwaith cyfranogol grêt sy’n cymryd lle o amgylch Cymru.

Yn olaf, gwerthusom y sesiwn drwy osod nodiadau post-it ar thermomedr i ddangos pa mor ddefnyddiol oedd y sesiwn.

Evaluation

Rydym newydd gyrraedd diwedd y rhaglen yma o rwydweithiau, felly gofynnwyd i’r cyfranogwyr ysgrifennu awgrymiadau ar gyfer digwyddiadau yn y dyfodol, fel y gallwn sicrhau bod y rhwydweithiau yn parhau i ddiwallu eu hanghenion. Gallwch weld yr adborth gan y rhwydwaith Gogledd Cymru yma, Rhwydwaith De Orllewin yma a Rhwydwaith De Orllewin Cymru  yma. Os oes gennych unrhyw awgrymiadau eraill rhowch wybod i ni yn yr adran sylwadau isod.

Diolch i bawb wnaeth dod ac rwy’n edrych ‘mlaen i rwydweithiau mis Mai!

– Dyfrig